نورستان لوړو زده کړو مٶسسه کې اداري ناسته ترسره شوه! شنبه، 1404هـ.ش، وري 2مه
په ياده ناسته کې، چې د مٶسسې رئيس پوهنيار قاضي خالد صداقت په مشرۍ ترسره شوه د مٶسسې مالي او اداري چارو مرستيال حافظ ناکيم ځدران په شمول د ځينو کمېټو آمرينو هم ګډون درلود. ناسته د قرآن کريم په څو آياتونو سره پيل او په يو شمېر اړينو موضوعاتو باندې خبرې وشوې. پدې ناسته کې د روان مالي کال په اړه هر اړخيزې خبرې اترې او بحثونه د ناستې ګډونوالو له لورې وشول، چې د مالي او اداري چارو مرستيال حافظ ناکيم ځدران د حاضرۍ په پابندۍ باندې اداري کارکوونکو ته لارښوونه وکړه او زياته يې کړه، چې مونږ ټول بايد د حاضرۍ تر څنګ خپلو مسٶليتونو ته متوجه شو. په پاى کې د مٶسسې رئيس پوهنيار قاضي خالد صداقت تېر (1403هـ.ش) کال د نورستان لوړو زده کړو مٶسسې لپاره د لاسته راوړنو ډک کال وباله او روان (1404هـ.ش) کال يې د لا پرمختګ او نيکمرغۍ ذريعه ياده کړه. ناسته د کارکوونکو چارو لوى مدير نعمت الله له لورې په دعاء کولو سره پاى ته ورسېده.
