د مرحوم اميرالمٶمنين ملا محمد عمر مجاهد (رح) ژوند او کارنامو په اړه٬ استادانو او محصلينو ته يو ورځنى سمينار وړاندې شو!
د مرحوم اميرالمٶمنين ملا محمد عمر مجاهد (رح) ژوند او کارنامو په اړه٬ استادانو او محصلينو ته يو ورځنى سمينار وړاندې شو!
چهارشنبه، ۱۴۰۴هـ.ش، چنګاښ ۴مه
د نورستان لوړو زده کړو مٶسسې استادانو او محصلينو ته د محصلانو خدمتونو او همغږۍ عمومي مديريت له لورې د ا،ا،ا بنسټګر مرحوم اميرالمٶمنين ملا محمد عمر مجاهد (رح ) ژوند او لاسته راوړنو په اړه يو ورځنى سمينار د مسلکي زده کړو په پرمختيايي مرکز کې وړاندې شو.
پدې سمينار کې د مؤسسې رهبرۍ غړو هم برخه اخيستې وه٬ چې په پيليزه وينا کې د مالي او اداري چارو مرستيال مولوي صديق الله سباوون د مرحوم ملا صاحب مجاهد په جهادي ژوند او مبارزه باندې رڼا واچوله او د سمينار ګډونوالو ته يې وويل، چې اوسنى اسلامي نظام او سوله د نوموړي د مبارزې او قربانۍ نتيجه ده.
ورپسې د شرعياتو پوهنځي استاد سيف الرحمن فرهود له لورې د سمينار ګډونوالو ته د مرحوم اميرالمٶمنين ملا محمد عمر مجاهد (رح ) ژوند، لاسته راوړنو او قربانيو په اړه بشپړ معلومات وړاندې شول.
استاد فرهود همدا ډول د نوموړي ژوند او جهادي مبارزه د اصحابو کرامو (رض) له ژوند او مبارزې سره ورته وبلله او ويې ويل، چې د مرحوم اميرالمٶمنين صاحب د ژوند ډېره برخه د ديني علومو په زده کړه او جهاد کې تېره شوې ده.
سرچينه: د نشراتو لوى مديريت
